ابدأ معركتك منتصرًا.
تعلم كيف تهزم هزيمتك النفسية.
لو انت ما شفتش مقطع الأسبوع دا 👇🏼
كل مرة بتبدأ غلط، وكل مرة مش بتوصل لبعيد.
السبب هو ان البداية من فكرة منهزمة هتوصل لنتيجة ضعيفة ومحدودة، الأمر مفيهوش أسرار.
أنا فاشل.
أنا عمري ما هنجح.
أنا ما استحقش أنجح.
أنا ضعيف ومغلوب على أمري.
الأفكار العبثية دي بتشل حركتك وبتخليك في حالة مزرية باستمرار، كأنك محبوس في سجن من صنعك الخاص.
بس ازاي تخرج من السجن دا؟
اننا نطبق أسلوب عكس اللي اتعودنا عليه.
استخدم النظام دا وهتوصل لنتيجة نفسك فيها بإذن الله:
خلي أملك في ربنا غير محدود (أحسن الظن).
ابدأ من فكرة قوية وملهمة.
قدم كل اللي عندك، كل حاجة.
أنا أقدر بإذن الله.
أنا ذكي وعندي مهارات بالفعل.
أنا عندي أكتر بكتير من اللي قدمته.
أنا متخيل نفسي في مكان ووضعية أفضل.
أنا تجاوزت أمور صعبة في الماضي وأقدر أكرر دا.
1. خلي أملك في ربنا غير محدود (أحسن الظن).
حسن الظن بربنا هيخليك مش فارق معاك حاجة ولا حد، هتقدر تطارد أي حلم انت نفسك فيه، وحتى لو موصلتش ليه، هتوصل لأعلى حاجة انت ممكن توصلها، الأمل بربنا هو اللي بيخليك تكمل حياة ونفس.
ما تعاملش ربنا بالورقة والقلم، عامله بحسن الظن اللي يليق بقدرته سبحانه وتعالى.
2. قدم كل اللي عندك، كل حاجة.
زي ما كنت عقبة في طريق نفسك، ارجع وسع الطريق تاني لنفسك.
اهتم بكل التفاصيل، كل حاجة تزقك لقدام خطوة زيادة كل يوم.
انت عارف دلوقتي 3 حاجات على الأقل يقدروا يعملوا فارق في يومك وحياتك.
خليك واعي ومصحصح وسيطر على تفاصيلك، انت مش عاجز زي ما انت متصور.
3. استمتع بانتصاراتك.
أنا متخيلك دلوقتي بعد ما عملت كدا (ولو كبداية) وشايفك مبسوط وبتضحك من جواك.
استمتع بكل خطوة جديدة بتخطوها وكل أمر صعب انت تجاوزته، دا هيساعدك تبدأ من القوة المرة الجاية.
Subscribed